ПЕНЗИИ ЗА ТЕРОРИСТИТЕ НА ОНА, БОРЦИ НА РМ

Министерот Бајрами потврди за пензиите за ОНА

Министерот за труд и социјална политика Џељаљ Бајрами вчера и официјално ја потврди информацијата на „Дневник“ дека Владата до Нова година ќе го реши и прашањето за пензии за поранешните припадници на ОНА. Бајрами не сакаше да коментира колку семејства ќе бидат опфатени, ниту колку буџетски пари ќе се одлеваат за тоа. За згрижувањето на таа категорија граѓани нема да се носи посебен закон, туку решението ќе се бара во постојните.

Како што објавивме, коалициските партнери, ВМРО-ДПМНЕ и ДУИ, сметаат дека сега, осум години по конфликтот, е време да направат отстапки од првичните крајно спротивставени позиции. ДУИ сега не бара посебен закон, ВМРО-ДПМНЕ прифати дека последици од конфликтот имаат и семејствата на припадниците на ОНА.

- Почнаа преговорите со ВМРО-ДПМНЕ и се надевам дека до крајот на годинава ќе најдеме решение што ќе биде прифатливо и за Владата и за таа категорија граѓани - изјави Бајрами.

Според него, пензија ќе добиваат сите што ги исполнуваат условите, но не и инвалидите од конфликтот што се' уште се работоспособни. Тие ќе имаат приоритет при вработување.

Најверојатно пензија ќе добијат семејствата на загинатите припадници на ОНА и на инвалидите на кои им е крајно неопходна таква помош. ДУИ бараше со пензии да бидат опфатени околу 230 семејства и тоа 120 на загинати и 110 на инвалиди од конфликтот.

Опозициската Нова демократија вчера ја обвини ДУИ дека отстапила од изборното ветување со посебен закон да го реши статусот на припадниците на ОНА.

- Последните изјави на ДУИ се за да ги смират страстите и немирното море во партијата пред конгресот. Треба да донесат храбро, а не привремено решение со кое еднаш-засекогаш ќе го затворат тој проблем - вели Сулејман Рушити. За СДСМ, договорот за обесштетување на борците на ОНА е потврда дека премиерот не ја говори вистината.

- Груевски демантира дека ќе прави коалиција со ДУИ, негира дека постои „мајски договор“, а денес се потврдува дека токму со тој договор што го склучи со Ахмети, се обврзал дека ќе ги обесштети борците на ОНА. Прво сакаме да видиме што е содржината на тој предлог, дали обесштетувањето Владата ќе го врши од социјално хумани причини или со политички пазарења и најважно - дали во пакет со обесштетување на борците на ОНА ќе се реши и статусот на бранителите - рече портпаролот Емилијан Станковиќ. (М.Т.)