Токму затоа некои ова финале го нарекуваат "финале од соништата" - најпосакувана завршница од Лигата на шампионите досега. Други, пак, неуморно го спомнуваат тој меч со Челзи и тврдат дека ова финале повторно требаше да биде сеанглиско.

БАРСЕЛОНА

Како и да е, вторпат во последните три години, а петтипат вкупно Барселона ќе игра во финалето од Лигата на шампионите во обид да стигне до третата титула во ова натпреварување. Ако се гледа традицијата, каталонскиот клуб сега би требало да загуби бидејќи во претходните четири финалиња има по две победи и порази, и тоа преку еден натпревар. Во 1961 и 1994 година загуби, а во 1992 и 2006 година победи, па овој аспект од традицијата е нешто на што Јунајтед се надева пред денешното финале.

Сепак, оваа сезона по многу нешта е историска за Барселона. Каталонскиот клуб има можност за првпат од своето постоење да освои три титули во една сезона откако веќе ги доби во своја сопственост пехарите од Примера и Купот на Шпанија, и тоа на доста убедлив начин.

Со оглед на тоа што двојната круна беше обезбедена пред две недели, Гвардиола имаше можност да ги одмори главните фудбалери за ова финале, па токму поради тоа не собори уште неколку рекорди во шпанскиот фудбал кои реално можеа сега да "паднат". На Барселона & се потребни четири гола за да биде најефикасна екипа во историјата на шпанското првенство кога станува збор за една сезона, но против Мајорка и Осасуна постигна само еден. Но, на тоа никој не обрнува внимание, најважно е Барселона да биде најдобра кога најмногу е потребно - во големото финале против актуелниот бранител на титулата.

Најголем проблем за Гвардиола во овие 15 дена беа повредите на дел од клучните фудбалери, како и главоболките што ги направија суспендираните. Добри вести стигнаа пред два дена кога Анри и Иниеста се вратија на тренинзите на својот тим и, најверојатно, ќе бидат дел од денешниот финален натпревар на Олимпико во Рим. Двајцата отпатуваа со остатокот од екипата и од нив се очекува да го вратат блесокот на Барселона кој недостасуваше последниот месец. Покрај тоа, ова е можеби последна шанса за Тиери Анри да освои титулата во Лигата на шампионите кој е последниот трофеј што недостасува во негова исклучително успешна кариера.

"Тие двајца се основен дел од нашиот фудбалски план. Знаеме дека ќе играат и ќе бидат 100% подготвени. Привилегирани сме што ги имаме затоа што со нив сме многу подобри", изјави лидерот на Барселона на средината од теренот Чави.

Анри и Иниеста беа клучни фудбалери во незапирливата напаѓачката тактика што оваа сезона и донесе на Барселона 151 гол во сите натпреварувања и два освоени трофеи. Ако вечерва стигне до третиот, ќе биде само третиот клуб во историјата на фудбалот кому му успеало да освои "тројна круна".

"Манчестер Јунајтед е актуелен првак, еден од најдобрите во светот, но тоа не ме плаши. Кон нив чувствувам ист респект како и тие кон нас. Ова е шанса да станеме дел од историјата, дури би прифатил и да победиме на пенали", рече Иниеста, кој го постигна оној клучен гол против Челзи во 93. минута со кој Барселона стигна до Рим.

Сепак, Барселона во последните сезони повеќепати покажа дека слабо се снаоѓа во дуелите со англиските екипи. Иако последната титула во Лигата на шампионите ја освои токму против премиерлигаш (Арсенал во 2006 година), сите се сеќаваат дека тогаш Леман беше исклучен, па и без него "топчиите" имаа предност која беше анулирана и надмината во финишот од мечот. Челзи со една затворена варијанта во полуфиналето комплетно го неутрализира нападот на Барселона и само благодарение на среќата каталонскиот тим тогаш стигна до израмнување кое донесе финале. Лани доживеа елиминација во полуфиналето исто така од Манчестер Јунајтед, кој слично како годинава Челзи се затвори на својата половина и со еден проектил на Сколс на почетокот од натпреварот дојде до минимална победа. Токму затоа Гвардиола сега ќе треба да покаже колку квалитетен тренер е. Сите очекуваа од него на реваншот против Челзи да измисли "План Б", но тој не го направи тоа и повторно се потпре на стандардната тактика која му носеше успех во Примера, но која придонесе за слабите резултати на овој тим во претходните две сезони кога на клупата беше Франк Рајкард. Сега и ќе му биде потешко затоа што во екипата ги нема двајцата бекови Дани Алвес и Ерик Абидал, кои се суспендирани, а кои имаат голем придонес во офанзивната игра на Барселона. Јаја Туре повторно ќе игра како стопер како што беше случај против Челзи во реваншот, а Пујол и Силвињо ќе ги покријат страничните позиции. Тоа може да биде проблем бидејќи Силвињо треба да го запре Роналдо.

"Мораме да бидеме смирени. Манчестер Јунајтед има фудбалери кои знаат како се освојува титула, имаме и ние, но помалку од нив. Тоа не треба да биде проблем за нас затоа што знам дека кај сите фудбалери постои огромна желба да се подигне пехарот и на тој начин да се круниса оваа прекрасна сезона", вели тренерот Гвардиола, кој со Барселона освои десет значајни трофеи вклучувајќи го трофејот во Лигата на шампионите во 1992 година.

МАНЧЕСТЕР ЈУНАЈТЕД

Актуелниот англиски и европски првак вечерва има можност да стане првиот клуб кој ја одбранил титулата во Лигата на шампионите од нејзиното формирање. Можност за тоа имаа Милан (1995 година), Ајакс (1996) и Јувентус (1997), но потклекнаа во завршните битки: Милан од Ајакс, Ајакс од Јувентус, а Јувентус од Дортмунд. Може ли Јунајтед да стане првиот кој ќе го сочува големиот пехар во своите витрини две години по ред?

"Тоа ќе биде голем натпревар. Среќен сум што ќе бидам дел од еден таков настан, фудбалскиот празник во Рим сигурно ќе биде еден од најголемите моменти во мојата кариера", вели Алекс Фергусон, кој повторно си најде цел за да работи во фудбалот.