ХАШКИ СЛУЧАИ - ќе има ли судска завршница

Обвинителката Славица Темелковски од одделението за организиран криминал, која беше надлежна за хашкиот предмет „Малтретирани мавровски работници“ и за последниот актуелен случај „Пепел“, ќе биде принудена да им ги отстапи предметите на други колеги. Истото се однесува и на Коле Штерјев, еден од првите јавни обвинители што работеа во одделението за организиран криминал, а познат по тоа што беше надлежен за случајот со авионската несреќа во која загина поранешниот претседател Борис Трајковски. Советот на јавни обвинители завчера не ги избра Темелковски и Штерјев за обвинители во новото обвинителство за организиран криминал и корупција. Иронијата е уште поголема кога ќе се земе предвид дека двајцата искусни долгогодишни обвинители ја поминаа обуката за постапување по предметите што ни беа вратени од Хаг, а во моментов Темелковски се наоѓа во Џенова, Италија, токму на обука за борба против мафијата.

Кога ќе се врати оттаму, ќе биде распределена да работи во Основното јавно обвинителство во Велес, од каде што дојде пред година и пол.

На изборот за обвинители во посебното обвинителство за организиран криминал и корупција не поминаа ниту Гордана Гешковска и Вилма Русковска, обвинителките што по долгогодишно работно искуство беа распределени да работат во Основното јавно обвинителство. Овој случај доби негативна оцена и во извештајот на Европската комисија, бидејќи, како што пишува, државниот јавен обвинител Љупчо Шврговски ги разрешил од неразјаснети причини пред да се формира Советот за јавни обвинители.

Со новонастанатата ситуација ќе помине многу време додека да бидат назначени нови обвинители што ќе ги водат предметите „Малтретирани мавровски работници“, кој беше вратен од Хаг, и случајот со полициската акција „Пепел“ поврзана со апсењето на кумановскиот тутунски бос Бајруш Сејдиу. На новите обвинители ќе им треба време додека да ги проучат случаите, по што постапката може да се развлече.

Државниот јавен обвинител Љупчо Шврговски вели дека одлуката за неизборот на Темелковски и на Штерјев била донесена со гласање од страна на Советот на јавни обвинители.

- Новоизбраните обвинители ќе ги наследат предметите на оние обвинители што не беа избрани, освен доколку станува збор за некој посензитивен предмет. За неизборот на Темелковски и на Штерјев не одлучував само јас, туку Советот на јавни обвинители, каде што јас сум само член. Обуката пак за постапување по предметите што ни беа вратени од Хаг ја поминаа уште пет од новоизбраните обвинители, така што тие ќе постапуваат по случаите - вели Шврговски.

Во врска со извештајот на ЕК, каде што како негативен момент се спомнува разрешувањето на Гешковска и на Русковска, Шврговски одговара:

- Кадровската политика и кадровската прераспределба јас не ги правам според Европската Унија, туку според моите познавања и оцени. Тоа се случи во период кога не беше формиран Советот на јавни обвинители, така што јас бев единствениот надлежен да врши именување и разрешување на обвинителите.

Како што дознаваме неофицијално од извори во Советот, Шврговски гласал Штерјев и Темелковски да бидат избрани во новото обвинителство за организиран криминал и корупција. Меѓутоа, во заднината на случајот, како што велат нашите извори, е меѓусебно препукување на членовите на Советот и јавниот обвинител Шврговски. Незадоволни од разрешувањето на Гешкоска и на Русковска, членовите на Советот решиле да не гласаат за Штерјев и за Темелковски, обвинители што важеа за блиски луѓе до државниот јавен обвинител. На тој начин изборот на обвинители, според нашите извори, се претворил во пресметка меѓу блиските луѓе на две структури.

На конк*рсот за јавни обвинители во новото обвинителство за организиран криминал и корупција се пријавија 12 кандидати за 10 слободни места. Од нив, само седум го добија потребното мнозинство гласови од Советот. За в.д. претседател на обвинителството за организиран криминал беше назначен Јован Илиевски. Обвинителите имаат мандат од четири години, со право на реизбор.

..toj na ovoj..ovoj na toj... otide jabana i obvinitelstvoto...i borbata protiv kriminalot...